Next-Level Media Buyers - Private Community

الدفع متاح عن طريق كروت الائتمان والخصم المباشر فقط حاليا وبيتم الخصم عن طريق منصة Stripe العالمية. قد يقوم البنك الخاص بك بتحصيل مصاريف تحويل عملة بسبب استخدام منصة دفع دولية. احنا مالناش اي دخل أو تحكم في المصاريف دي

كلمة غالي أو رخيص دي نسبية جدا عموما. أنا مش بحب الرد بتاع "لو غالية عليك تبقى مش ليك" عشان بحسها شبيهة بـإنك تقول لحد "يا فقير" في حين إنه ممكن يكون مستعد يدفع اضعاف الرقم ده بس عايز يتطمن على القيمة اللي هياخدها. في وجهة نظري انت ممكن تاخد معلومة في 5 دقائق تنورلك حاجة ممكن تكون قيمتها اضعاف الرقم اللي انت دفعته الشهر كله بسبب الوقت/المجهود/الفلوس اللي هتوفرهالك. أنا طبعا مش بقول هنا إني اضمنلك إن ده يحصل لكنه بيحصل كتير في الإستشارات الحمد لله اللي هي الساعة الواحدة فيها بـأضعاف الإشتراك الشهري, فمتوقع إنه إن شاء الله يحصل في الكوميونيتي وانا هبذل كل المجهود اللي في استطاعتي عشان اخليه يحصل. أنا بأعمل محتوى من 2020 اكثرمن 100 حلقة بودكاست و عشرات المقالات على صفحتي على فيسبوك ومؤخرا كورسات كاملة مجانية تماما على يوتيوب + موقعي الشخصي ده فيه كل اللي محتاج تعرفه عني تقريبا. فـانت عندك فرصة "تجرب" الخبرة/المعلومات/طريقة التفكير مجانا تماما ولو حسيت إنك عايز تاخد خطوة أكبر ومقتنع بالقيمة تقدر تقدم. ممكن برضو تكون استفدت جدا بالمحتوى المجاني بس مش مقتنع بالقيمة مقابل السعر وده حقك طبعا وانا هتفهم ده تماما ويا رب يقدرني واقدر افضل افيدك بالمحتوى المجاني لسنين كتير قدام.

تلجرام فيه كل حاجة احنا محتاجينها في المرحلة الحالية بدون "بهوقة" يعني مش واسع أو معقد زيادة عن اللزوم زي بعض ادوات الcommunity management فـاحنا هنكون بينه وبين Google Meet غالبا على الاقل في المرحلة الحالية. كمان تلجرام بيبسط جدا عملية الإشتراك والغاء الاشتراك وبيخليها automated بنسبة 100% تقريبا.

ده سؤال مهم جدا الحقيقة وانا متفهمه جدا لإن فعلا لستة المتطلبات ممكن تبان منفرة أو حد ممكن يحس "إيه يا عم ده انت لو هتطلعلنا مرتب شهري لوجودنا في الجروب مش هتعمل كده" فخليني اجاوب. قبل أي حاجة متنساش إن مصلحتي المادية البحتة إني طبعا آخد الفلوس من أي حد هيدفعها وأهلا بيك معانا في الجروب ويلا بينا, موضوع الفلترة ده شغل اضافي علينا + فلوس اقل بكتير لينا بس فيه أسباب لده. للاسف مجالنا فيه ناس كتير بتتكلم ومش بتعمل أو زي ما المثل بيقول "دخان منغير كفتة". لو انت عندك خبرة وبتشتغل على نفسك جامد أكيد هتكون عايز تكون في وسط ناس بنفس الفكر عشان كله يزق بعضه لقدام. أنا في الجروب ده مش مجرد بدور على "عميل" أنا بدور على صديق خبرة وثقة لكل واحد موجود في الجروب. قوة الكوميونيتي ده في الناس اللي فيه قبل أي حاجة تانية وقبل وجودي أنا شخصيا حتى من وجهة نظري.

مش الهدف إني اقبل فقط الناس اللي بتصرف 10 مليون في الشهر أو ايا كان الرقم الكبير اللي في دماغك إيه. الاهم بالنسبالي إنه شخص يكون فعلا اشتغل بـايده وحقق نتائج وعايز يتطور وطريقة تفكيره ومعاملته للناس متناسقة مع اتجاه الcommunity. انت ممكن تتعلم حاجة قيمة جدا من حد مبيعملش 10% من دخلك الشهري لمجرد إنه مركز في حتة أو تعمق في حتة أو عدّى عليه حاجة معدتش عليك.

كله بيتم عن طريق Telegram Bot بشكل automated وهيتم ارسال التفاصيل كلها بعد التقديم.

حاليا السعر وطرق الدفع الموجودين على الصفحة دي هم المتاحين.

ده هيعتمد بشكل كلي على الاعضاء. أحد اهم أهداف الcommunity إنه يكون مكان آمن للأعضاء انهم يشاركوا تفاصيل وياخدوا نصيحة وبالتالي لازم نحترم رغبة الناس لو عايزة تعمل ده بدون تسجيلات. الموضوع ده ممكن يكون فيه مرونة برضو يعني ممكن نسجل جزء معين وجزء تاني مايكونش مسجل حسب رغبة الأعضاء بس مش هيكون فيه قاعدة ثابتة أو ضمان للموضوع ده.

حسب بتعرف مبتدئ إزاي. لو المتطلبات اللي فوق موجودة تقدر تقدم عادي. لو لأ يبقى للاسف مش هتتقبل حتى لو معندكش مشكلة تدفع مبلغ الإشتراك. الفكرة إنك أصلا غالبا استفادتك هتكون محدودة جدا و الموضوع مش هيكون جايب همه بالنسبلك لو المتطلبات دي لسة مش عندك. إن شاء الله يكون فيه حاجات تانية مستقبليا موجهة للمبتدئين.

سؤال مهم والإجابة لأ. لو عايز دعم شخصي مباشر فالخدمة المخصصة لده هي الإستشارات. الcommunity بيضمنلك وجودي في كل المكالمات و في الجروب الخاص مقابل اشتراك شهري رمزي مقارنة بسعر الإستشارات. دايما هحاول أكون بجاوب على كل الاسئلة وبقدم الدعم لكل الناس بس مقدرش اضمن لشخص بعينه وقت محدد أو دعم شخصي معين. احنا بندير الcommunity بشكل بنحاول نكون فيه عادلين مع الجميع وندي الفرصة للجميع في المشاركة بقدر الإمكان لكن هنكون برضو مقيدين لإن في النهاية ده group setting وفيه عدة أشخاص موجودين وبيتكلموا سواء على الcalls أو في الجروب.

لأ. هتفضل تجدد بنفس السعر لحد نهاية 2025 بعد كده لو السعر زاد هيتم رفع سعر التجديد.

الcommunity مش كورس, هو مكان لمناقشة مشاكل المجال, اخذ النصيحة وتبادل التجارب والخبرات في وسط ناس دماغها زيك.

تقدر تسترد الفلوس كاملة أي وقت قبل موعد ثاني ميتنج من وقت اشتراكك. بعدها فلوس الشهر ده غير مستردة بس تقدر تلغي اشتراكك بشكل مباشر عن طريق Telegram ومش هيتم خصم أي مبالغ اضافية.

الإستشارات بتكون مركزة 100% على مشكلتك أو احتياجاتك ومتفصلة لحلها هي بالذات. الدعم بيكون شخصي على طول الطريق ووقت الاستشارة كله بيكون ليك. أما الcommunity, فزي ما تم التوضيح فوق هي تجربة جماعية هتسمح برضو بالاسئلة والإستشارات ولكن بيتم ادراتها بشكل يسمح للجميع بالمشاركة وبالتالي هي مش مناسبة لو انت عايز التركيز الكامل يكون على التحديات اللي بتقابلك فقط.

افضل طريقة من خلال الemail. املا الفورم الموجودة على itsyoussef.com/contact